للتذكرة فقط الغباء السياسى بيكرر نفسه , للتذكرة فقط السياسة والعسكر ملهومش قلب
للتذكرة فقط الناس اللى بتطلب تتعالج عشان مصابين بعاهات من الثورة ومحتاجين يعملوا عمليات جراحية مكلفة وصبروا عشر شهور عشان حد يعبرهم ولا حياة لمن تنادى بيتضربوا وبيتسحلوا عشان مش من حقهم اصلا !!!!
للتذكرة فقط اللى سرق ونهب البلد تلاتين سنة وعصابته بتاعت الاربعين حرامى بيتعالجوا على نفقة الدولة وعايشين اصلا على قوت الشعب اللى مش لاقى ياكل !!!
للتذكرة فقط اى حد هيطلب مستوى معيشته تتحسن او يطلب اى مطلب ( مشروع فى رأيى ) هيبقى بيطلب مطالب فئوية وبيعطل عجلة الانتاج ( اللى هى تقريبا متعطلة من تلاتين سنة ) !!!
للتذكرة فقط انك تطلب بالتغيير فى بلدك وتنزل مسالم جدا مش معاك اى وسيلة تدافع بيها عن نفسك تقوم تضرب وتتسحل ويتنشن الخرطوش فى عينك وتتعمى وبرضه هتبقى بلطجى وهمجى ومتأجر ومدفوعلك وبتكره البلد دى !!
للتذكرة فقط هتنزل تدافع عن مصابين (مكملوش مائتين فرد فى صينية الميدان مش معطلين اى حاجة ) هتضرب وهتتسحل معاهم وهتبقى مصاب زيهم واكتر او ربنا هيكرمك وهتنضم لقايمة الشهداء الطويلة اللى مش بتنتهى ( من الاخر عليك وعليهم !!! )
للتذكرة فقط قالولنا الداخلية مكسورة ومش عارفة ترجع واكتشفنا اكتشاف خطير ان الداخلية فى كامل جبروتها وعنجهيتها واكتشفنا اننا ولا كأننا عملنا ثورة !!!!
للتذكرة فقط الناس اتضربت واتسحلت واتشدت من شعرها ( بنات وولاد وستات ورجالة وشيوخ ومسنين وكل الفئات مباحة وملهاش حرمة ) واتقتلوا ونشنوا فى عيونهم عموهم او عوروهم ولما استشهدوا اتجروا واتسحلوا جمب (الزبالة ) مع انه ده مش مكانهم خالص !!!
للتذكرة فقط محدش حمى الثورة غير ربنا ومحدش هيحميها وهيكملها غيره برضه ومفيش فضل لأى حد تانى فى حمايتها !!!
للتذكرة فقط مش كل مين قالك انا معاك يبقى معاك !!
للتذكرة فقط اللى بيقولوا انتوا خربتوا البلد ( الشرفاء كما يطلق عليهم التليفزيون المصرى والمجلس الأعلى للقوات المسلحة ) ياريت ميجوش بعد كده يقولوا (ثورتنا ) وان شاء الله لما الثورة تكمل على خير حد يفكرنى اقولهم ان هما اللى ياما خربوا البلد !!!
للتذكرة فقط كل الأحزاب باعت الثورة وبيلعبوا مع بعض لعبة الكراسى الموسيقية كل واحد عايز يلحقله كرسى وفى داهية اى دم سال واى ناس ماتت واى ناس هتكمل عمرها بعاهات مستديمة ( باستثناء ائتلافات شباب الثورة اللى هما شرفاء بحق وحقيقى )
للتذكرة فقط المناصب بتغير والكراسى بتغير والسلطة بتغير الناس بتنسى بسرعة مين اللى وصلهم للمناصب دى وهما موجودين فيها ليه اصلا !!!
للتذكرة فقط لكل واحد نسى وافتكر انه قوى ( ربنا ما بيرضاش بالظلم ) وهو أقوى من أى حد =)) والدم اللى اتغرق بيه الارض ده هيطهرنا كلنا ومش هيروح هدر !!!!
للتذكرة فقط الثورة هتكمل ان شاء الله وكل واحد ليه حق هياخده وكل واحد استشهد دمه مش هيروح هدر ( عشان ربنا اسمه العدل =) )
وعشان هى عمرها ما بتخلص كده
للتذكرة فقط أى حد بيقول دول مش شباب ثورة يناير العظيمة (عشان مش عاجبه اشكالهم ) نسيت اقولك ان للأسف مبارك مشى وساب اكتر من نص الشعب تحت خط الفقر فمعلش معرفوش يطقموا وهما نازلين يجيبوا حقك وانت قاعد فى بيتك عشان الدنيا برد !!!
للتذكرة فقط الداخلية انكرت ضرب المتظاهرين او حتى وجود رصاص حى او مطاطى او خرطوش وانكروا ان الغاز المسيل للدموع ( غاز اعصاب ) مع العلم المفروض الناس اللى ماتت واتصابت دى المفروض كانوا نازلين يعملوا انتحار جماعى او كائنات فضائية نزلت عملت فيهم كده العلم عند الله !!
للتذكرة فقط المجد للشهداء والعار لكل واحد خونهم او شتمهم او ساعد فى قتلهم او اصابتهم او حتى محاولش يفهم اى حاجة واستكفى بغبائه المفرط وقفل عليه دماغه ( مع كامل اعتذارى للغباء ) !!!
ليست هناك تعليقات:
إرسال تعليق