حكاية زى اى حكاية تبتدى بنظرة وتنتهى بنظرة
اول ما فتحت عيونه شافها هى , واول ما فتحت عيونها شافته هو , كانوا مع بعض فى المدرسة من يوم ما دخلوها , هو كان صاحبها الوحيد وهى كمان , كبروا مع بعض , الوقت ما بعدش بينهم زى عادته دايما بالعكس كان بيربطهم ببعض اكتر , اول ما تزعل كانت بتجرى عليه هو عشان تقوله عشان هو الوحيد اللى هيفهم ومن غير ما تقول كان هيفهم , عمره ما سأل نفسه هى بالنسباله ايه وجودها فى حياته كان كفاية اوى عليه , هو كان بالنسبالها كل الاشخاص متلخصة فى شخص واحد , علاقتهم كانت خاصة اوى حتى لو ملهاش مسمى غير انهم اصحاب او حتى اخوات : )
هى عنيدة اوى وهو عارف ازاى يتعامل مع عندها ده عشان كده كانت مشاكلهم قليلة , كل ده كان فى سنين المدرسة دخلوا الجامعة سوا وبرضه الزمن مالعبش لعبته المعتادة وسابهم قريبين شوية كمان
فجأة هو قرر يصارح نفسه واكتشف انه فعلا بيحبها وان لازم علاقتهم تاخد شكل تانى لان هو مش عايز يخسرها تحت اى ظرف من الظروف , بس للأسف فى الوقت ده كانت هى بدأت تاخد قرارات كتييييير لوحدها تحت شعار " انا حرة فى حياتى " , زى مثلا ما قررت فجأة انها هتشتغل موديل !! , اول مرة كان يعترض على تصرفاتها بشكل صريح قالها باللفظ " فيه واحدة تشتغل انها تخلى الناس تتفرج عليها !!" , المشاكل زادت اوى وهما الاتنين قرروا ان البعد اسلم حل وقد كان !!!
هو : عارف كويس جدا انه مش هيقدر يستغنى عنها لانها طول عمرها كل حاجة
هى : عارفة كويس جدا جدا ان مفيش مخلوق على الارض هيعوضها عنه
هو : مقتنع جدااااا انه بيحبها وانه يكاد يكون من المستحيل ان ينساها !! هينسى ايه ؟؟ هينسى عمره كله , هى كانت موجودة فى كل احداث حياته
هى : بتكدب نفسها انها بتحبه ! الحب فى نظرها ضعف , هى مقتنعة انها لو حبيته هتخسره عشان الحب دايما بيفشل والصداقة عمرها اطول بس هى متأكدة انها عمرها ما هتنساه
هو : عارف انها مش بتثق فى حد خالص وانها دايما عاملة نفسها قوية عشان بتحب الناس تشوفها كده مع ان هى ارق من كده بكتيييير
هى : مش بتثق فى اى حد فعلا غيره بس مش الثقة هى اللى منعتها عنه بس كبريائها واحساسها انه بيتدخل فى حياتها وده مش من حقه !!
"دانا عمرى ما قولت ان انا خايف غير بعد ما قلبى اتمناكى , محتاج اتطمن مش عارف الخوف جوايا وجواكى , لو كنتى صحيح بتحبينى ضمينى فى حضنك خبينى الخوف ما يجيش وخايف اوعدك ما اوفيش "
صوت منير كان اعلى من كل حاجة , هما من فترة مش بيشوفوا بعض هما الاتنين قرروا كده , اتقابلوا النهاردة المفروض انها صدفة بس الحقيقة هى ما كانتش كده , هو اصحابه قالوله انها هتكون موجودة راح طاير , وهى عرفت انه هيكون موجود راحت جرى , بعد تلات شهور مش بيشوفوا بعض بعد ما كانوا كل يوم مع بعض بحكم الجامعة وبحكم انهم اصحاب ! , هما الاتنين قرروا ان علاقتهم تقتصر على كده !!!
كل الناس كانت بتتكلم الا هما ! , صوت منير كان واخدهم هما الاتنين , حب منير كان من الحاجات المشتركة بينهم من زمان : ) , فجأة هو قرر يكسر الصمت ده , ما هو لازم يتكلم لأنه يا عاااالم هيشوفها تانى امتى !
هو: مالك ساكتة ليه؟
هى: لا مفيش بس سرحت مع الاغنية , انت عامل ايه فى شغلك ؟
هو: الحمد لله كله كويس وبدأت اتأقلم فيه , انتى عاملة ايه فى شغلك ؟ (قالها ونبرة صوته متغيرة)
هى: الحمد لله مبسوطة اوى فيه (قالتها وهى بتضحك )
سكتوا تانى وهو حب يغير الموضوع لانه مش عايز يقفل الكلام من قبل ما يتكلموا
هو: فين ايام زمان لما كنا بنشوف بعض كل يوم , كلنا يعنى
هى: اصل خلاص بقى كله بقى مشغول فى شغله وحياته مفيش حد فاضى زى زمان
هو: اه بس اللى عايز حاجة بيعملها
هى: طب ما تقول لنفسك : )
هو: لا انا بسأل على اللى سؤالى يفرق معاه
هى: تقصد ايه؟؟
هو: ولا حاجة بس انا عمرى ما كنت اتخيل انك تكونى ابعد حد عنى بعد ما كنتى اقرب ليا منى : )
هى: انت اللى وصلتنا لكده , دايما بتعمل مشاكل من مفيش خصوصا الفترة الاخيرة
هو: وما سألتيش نفسك بعمل كده ليه؟ غاوى مشاكل مثلا؟ مش خوف وحــ (سكت شوية ) مش خوف عليكى يعنى؟
هى: ايوه انت المفروض تقولى رأيك وبعدين انا حرة اخد بيه او لأ دى حاجة تخصنى وما تزعلكش !!
هو: هتفضلى طول عمرك تعندى , ممكن اسألك سؤال؟
هى: اتفضل
هو: انتى بتحبينى؟؟
سكتت شوية كتييييير
هى: اكيد بحبك احنا عشرة عمر
هو: انا مش قصدى زى اخوكى وزى صحابك انا بتكلم عن حب تانى : )
هى: ايه الكلام الغريب اللى بتقوله ده !! , انت مش عارف رأيى فى الموضوع ده
هو: انا عارفك انتى اكتر ما عارف رأيك فى الموضوع ده , اسمعى احنا منقدرش نستغنى عن بعض وانا بحبك اوى خلينا نفضل مع بعض على طول : )
هى: ايه الكلام ده !!! , انا فعلا مقدرش استغنى عنك بس , بس انت زى اخويا !
هو: انت بس بتعندى , انتى ......
موبايلها رن
هى : ثوانى ارد على الموبايل ,الو , ايوه , ااااااه سورى انا كنت نسيت , خلاص نص ساعة وهكون عندكوا , باى
هو: عندك شغل؟
هى : اه كنت ناسية خالص , قبل ما امشى لازم اقولك انك اغلى حد عندى فى حياتى وانى مش عايزة اخسرك فى يوم من الايام واللى انت بتقوله ده اكتر حاجة تخلينا نخسر بعض
هو: لأ انتى فاهمة غلط انتى .......
هى: انا بجد لازم امشى وان شاء الله اشوفك قريب ومش محتاج اقولك لو احتاجت حاجة كلمنى : ) , باى
وكانت اخر مرة يشوفوا بعض فعلا , وكانت اخر نظرة بينهم نظرة عتاب منه ونظرة اسف منها !!
" ما انيش اخر حبيب يدخل مدينتك ولا هتكونى يوم اخر حبيبة ده اللى انكتب مفروض يا عنقود العنب واللى انجرى غنيوة بس قصيرة , مشرووووخ يا نااااى ماتغنليش زعجك وجعنى آآآآآه ولا كفانيش "
صوت منير على تانى , وكل واحد راح لحاله
ومن العند ما قتل : )
