النهاردة آخر يوم فى السنة , السنة خلصت خلاص بحلوها ومرها بكل حاجة , بس لازم الواحد يعترف انها سنة غير كل السنين , أنا عن نفسى حسيت انها عدت بسرعة يمكن عشان كانت أحداثها كتير !! بس الأكيد انها أكيد سابت علامات وبصمات عند الناس كلها سواء علامات حلوة أو وحشة مش مهم المهم انها مش هتتنسى =))
السنة دى بالنسبالى كمجمل عام كانت سنة انجازات , وبالنسبالى سنة جميلة عشان الثورة بدأت فيها حتى لو لسه ما كملتش , أحب أحكى بقى عن اللى بعتبره انجازات ده =)) :-
- انى اخدت قرار انى هبطل ادمان البيبسى وفعلا بدأت فى ده
- انى بدأت أفكر فى مستقبلى اكتر واحس ان اللى ضيعته كتير ومينفعش اللى جاى يضيع كمان فأول خطوة هاخدها انى هذاكر كويس حتى لو دى آخر سنة ليا فى الدراسة وحتى لو انى مازالت مش بحب الدراسة دى ومش حاساها مجالى بس انا اكيد ربنا حطنى هنا عشان سبب معين هعرفه بعدين =))
- ان حصل فلترة لناس كتير خرجت من حياتى كنت فاكراهم لو خرجوا هتبقى أزمة بس اكتشفت ان خروجهم رحمة بيا
- انى من جوايا بقيت أقوى والضعف اللى كان موجود لأسباب معينة تلاشى تقريبا
- انى بقيت اتحدى نفسى حتى لو خايفة وبقيت بشارك فى حاجات انا شايفاها ايجابية حتى لو غيرى شايفها ملهاش لازمة =))
- انى عرفت صحابى بجد من صحابى البلاستيك وعرفت الناس اللى بتحبنى بجد من الناس اللى بتنافقنى !!
- انى بدأت أفكر فى قدام وارسم خطوات واسعة شوية
- انى رجعت لادمانى الاول والاخير الكتب عمرى ما بحس بسعادة فى حياتى اكتر من سعادتى وانا ماسكة كتاب بقرأه
دى الحاجات اللى فى دماغى حاليا وتعتبر الحاجات اللى علمت فيا جامد , المهم ان فى آخر كام ساعة فى السنة أحب أقولك كنتى سنة صعبة وجميلة ومؤلمة ومفرحة كان فيكى كل الاحاسيس الحلوة والوحشة احلى ما فيكى ان الثورة بدأت فيكى وأحب أقولك انك عمرك ما هتتنسى أبدا =))
يارب تبقى السنة الجديدة سنة خير علينا وتبقى سنة كلها أحاسيس حلوة بس =))
