يـعـدى الـصـيـف ....

يعدى الصيف ويجى الشتا وأنا زى ما أنا

تفوت أيام وأسمع كلام عن حلم راح وانتهى

نفسى أنادى بأعلى صوتى نفسى أهرب من سكوتى

نفسى أكسر الحواجز فى مكانى متكتف وعاجز

نفسى أغير وأتغير

ويعدى الصيف ويجى الشتا وأنا زى ما أنا

تفوت أيام وأسمع كلام عن حلم راح وأنتهى

نفسى أختار طريقى

نفسى أهرب وأفك ايدى

نفسى أتكلم وأقول

نفسى أزعق وأثور

نفسى أغير وأتغير

ويعدى الصيف ويجى الشتا

وأنا زى ما أنـــا

عـايـزة أعـيـش فـى كـوكـب تـانـى !!

عايزة أمشى , عايزة أغمض عينى وأفتحها ألاقينى مش أنا ألاقينى حد تانى فى حياة تانية مع ناس تانية

بجد تعبت وزهقت من نفسى حد المرض ,عايزة أنزل أجرى فى الشارع محدش يقولى بتعملى كده ليه !! , عايزة أبقى حرة نفسى

أكتر حاجة حقيرة فى الدنيا انك تحس انك مجبور ولا حول ليك ولا قوة وتبقى فعلا مفيش حاجة فى ايدك تعملها

وأسخف حاجة انك تلاقى غيرك بيرسملك حياتك اللى أصلا ربنا خلقك عشان ترسمها لنفسك عشان أنت اللى هتتحاسب عليها وعلى قراراتك فيها , بأى حق الناس بتتحكم فيك كده؟؟!! , خوف ؟ حب ؟ سيطرة ملهاش معنى ؟ ايه بجد !!؟؟؟

عايزة أصرخ , بس ليه محدش سامع ولا هيسمع وحتى لو سمعوا مش هيفهموا !!! , كل تصرفاتى وأفكارى بالنسبالهم جنان , كل تصرفاتهم تجاهى المفروض اعتبرها خوف وأفهم ان هما اللى فاهمين كل حاجة وعارفين كل حاجة وانا مليش أى لازمة أنا شىء بريموت بس معرفش هو راح فين الريموت أصلا !!

دوشة غريبة فى دماغى , شوية بقول أريحهم وأخدهم على قد عقلهم وأعمل اللى عايزاه فى الآخر وشوية برفض فكرة انى مغصوبة وانى ماشية بالعافية دى , وشوية بشك انى اصلا صح فى أفكارى وبحس انى ممكن فعلا أكون غلط لأنى بسمع الكلام هو هو من كل الناس !!!

أنا مش مجنونة أنا بس مش لازم أمشى بنفس طريقة اللى قبلى عشان أكون صح !! , انا شايفة ان الصح والغلط واللى مفروض واللى مش مفروض دى مقاييس بتختلف من حد لحد ولازم كل واحد يحترم ده فى التانى , انا من حقى أختار حياتى تمشى بأنهى شكل زى ما الناس بتختار , أنا بجد حرة ومفيش أى مبرر يخليهم يمشونى بالطريقة دى !!!

انا نفسى ابقى مبسوطة , نفسى الاقى الحد اللى ميتخلاش عنى , نفسى الاقى الحد اللى من غير قناع اللى مستعد يعيش معايا عمره كله , الحد اللى يحبنى عشان انا نيفين ويحب نيفين بعيوبها قبل مميزاتها مش يحبها عشان عايز يغيرها ويعمل نيفين اللى فى دماغه ويطلع عقد آدم المدفونة فيها !! , جايز عمرى ما اقابل الحد ده بس مش مهم ممكن اعيش لوحدى ارحم ما اعيش مع حد انا كارهاه وكارهة عيشتى معاه وكل همه ياخدنى من اهلى بالريموت بتاعى عشان ده دوره ! , بس للأسف أنا ريموتى ضايع =)

اللى هيعرف نيفين بجد هيعرف يتعامل معاها من غير ما يكون محتاج ريموت اصلا , وانا هفضل مستنية اللى عايز نيفين من غير ريموت , حتى لو مستنية سراب !!

نفسى أسافر نفسى أبعد بعيد عن كل الناس أبعد لوحدى مش عارفة فين ولا أصلا ده ممكن يحصل , بس أنا نفسى فى كده أوى نفسى بجد أعيش فى حالى نفسى الناس تسيبنى أعيش بدماغى حتى لو شايفنى مجنونة مش مهم =))

يــــارب هـــون عــلـــيـــا وخـــلـــيـــك مـــعــــايـــا عـــشـــان مـــلـــيـــش حـــد غــــيـــرك =((

وسـقـط الـقـنـاع ..!!!

الكدب بقى بيجرى فى عروق الناس , فعلا الموضوع ده صح جدااااا

أوقات بحس من كتر صدماتى فى الناس انى مش قادرة اتكلم فقدت القدرة على الكلام عايزة اسكت بس حتى مش عايزة اسمع حد

انا ليه دايما بعامل الناس بحسن نية أوى كده وليه بتعامل على أساس ان الكل هيتعامل زيى !!! ليه كل الناس بتصعب عليا وفى الاخر بكتشف ان اللى بيصعبوا عليا دول ما هما الا أقنعة وانا اللى كنت بصعب عليهم عشان انا ساذجة !!!

ليه لما بحاول اتغير والبس قناع انا كمان على الأقل يحمينى مش بعرف !!!

طب لييييه الناس بتكدب أصلا !! , الدنيا أبسط من اننا نكدب فيها ونتعامل فيها كده أنا شايفاها كده , الدنيا دى كلها أيام وهنمشى ومش راجعين ليه كل اللى نسيبه بصمة وحشة وناس كارهانا !! , هو ايه اللى هيفضل مننا فى الدنيا غير البصمة اللى هنسيبها والذكرى الحلوة , هو انا بفكر كده عشان انا ساذجة ولا فيه ايه غلط بيحصل ؟؟؟!!

بجد أوقات بوصل لمرحلة انى كارهة نفسى عشان بعمل فيها كده عشان قلبى ضعيف وانا اصلا ضعيفة , عشان بيصعب عليا ناس أول ما بيحسوا بضعفى القناع بيوقع !!!

بس فعلا انا مش زعلانة لان فى الاوقات اللى زى دى بحس قد ايه ربنا بيحبنى وبيقولى شوفتى هما دول اللى بتحبيهم وتخافى عليهم هما دول اللى بتحسسى على الكلمة قبل ما تطلعيها من بوقك أحسن توجعهم شوفى وشهم الحقيقى عامل ازاى !!!

وكده أحسن ما أفضل فاهمة برضه ان الناس كلها بيضة من جواها , مش زعلانة بجد بالعكس كل ما يوقع قناع هفرح حتى لو اللى كنت بقول عليهم دول اللى طلعت بيهم من الدنيا بيقلوا يوم بعد يوم مش مهم ما هما مكانوش حقيقيين اصلا دول كانوا بيتنفسوا كدب انا كنت بتعامل مع شخصيات من خيالى مش هما دول !!

أنا برضه مش هتغير هفضل أتعامل كده عشان ما اخسرش نفسى , ان شاء الله هقابل الناس الصح اللى تقدرنى زى ما اقدرها , كل حاجة بتحصل فى الدنيا بتحصل عشان سبب , واللى بيحصلى ده بيحصل عشان اتعلم منه وابقى أقوى من كده , مرة على مرة مش هبقى ضعيفة كده !! , بغض النظر عن الصدمات والوجع والاندهاش هفكر احسن فى النتائج اللى هوصلها من ده .

مش زعلانة بجد وفى انتظار باقى الأقنعة تسقط =)) !!

حبيبى ....

وحشتنى أوى أوى مفتقداك أكتر من أى حاجة تانية فى حياتى

فاتت سنين كتير أوى عن آخر مرة شوفتك واتكلمت معاك بس انت عمرك ما غيبت عن بالى دايما فاكراك ودايما بتكلم عنك ودايما بقول انك كنت وهتفضل اكتر حد حبيته فى حياتى !! , أنا عارفة انك مستغرب عشان احنا لما كنا مع بعض انا كنت صغيرة أوى ساعتها بس أنا فاكرة كل حاجة كأنها كانت لسه امبارح

انا دلوقتى شكلى اتغير ودماغى كبرت وبقيت مش فيا أى حاجة من زمان غير قلبى , بس انت لو كنت موجود دلوقتى وكنا بنتكلم كنت هحكيلك حاجات كتيرة أووووى وكنت هسمع منك اكتر عشان انا ملحقتش اسمع منك حاجة , لو كنت موجود متهيألى حاجات كتير فى حياتى كانت هتبقى مختلفة عشان انت وجودك فى حياتى مكنش عمره عادى , أى نعم كل علاقتنا كانت لعب وتهريج وضحك وخروج بس انت علمت فيا وانا قليل لما حد يعلم فيا كده !!!

عارف انى فاكرة كل حاجة كنا بنعملها لما كنت بلعب انا وانت " المسرح القومى " ونفضل نضحك لما بطنى توجعنى =D وفاكرة لما كنت بتخلينى اغسل ايدى بالبتاع بتاع الحلاقة بتاعك عشان كنت بحب الرغوة بتاعتها =D وفاكرة لما كنت باكل كتير وكنت بتقولى انا هسميكى البلاعة انتى بتاكلى اى حاجة كده =D < على فكرة انا مبقيتش باكل كتير خالص =) >

فاكرة لما كنت بتيجى تصلى وكنت بقف جمبك واقلدك قال يعنى بصلى =) , فاكرة لما كنت بتجيبلى ايس كريم ورز بـ لبن وحاجات حلوة كتير وكنا ندخل السوبر ماركت تقولى جيبى كل اللى انتى عايزاه =)

فاكرة يوم الوقفة لما كنا بنيجى نبات عندكوا ونصحى يوم العيد الصبح عشان نروح نصلى العيد ويوم الوقفة بالليل تدينى ال 100 جنيه العيدية بتاعتى وانا كنت عيلة بالنسبالى ال 100 جنيه دى موازنة دولة :)

فاكرة لما كنت بتودينى السينما وتجيبلى أكل من برة ونقعد نتفرج على ونيس مع بعض :) انت عارف انى كل ما اشوفه افتكرك مع انه مش شبهك خالص بس انا حاساه انت :)

فاكرة لما كنت بقولك خدنى معاك وانت رايح تصطاد وانت كنت بتقولى لما تكبرى هاخدك معايا وكنت شايلى سنارة مكتوب عليها اسمى فى دولابك وقولتلى هديهالك لما تكبرى :( انا كبرت على فكرة دلوقتى بس ملحقتكش :( وعلى فكرة باعوا السنارات كلها وكل حاجة عشان كانوا مش عايزين حاجة تفكرهم حتى السنارة اللى عليها اسمى ما رضيوش يخلونى اخدها مع انى قولتلهم انها بتاعتى بس محدش سمعلى !!, مش كنت اديتهالى زمان أحسن :(

ماما قالتلى انك زمان كنت شديد معاها اوى بس انا عمرى ما حسيت ده انت كنت أحن حد عليا ومتهيألى لو كنت موجود كنت هتبقى أقرب حد ليا :) أنت وحشتنى أوى بجد ونفسى أشوفك , من فترة لما كنت واحشنى أوى فضلت تجيلى كل يوم فى الحلم أسبوع كامل وكنت بتكلم معاك فاكر ؟ , تعالى زورنى تانى عشان نتكلم تانى :)

أقولك سر انا كل اللى يعرفونى كويس لما يحبوا يحلفونى يقولولى (ورحمة جدك ) عشان عارفين انت ايه عندى وانى استحالة حد يحلفنى الحلفان ده واردله طلبه :) , شوفت بقى صفية بتحبك قد ايه :) وشوفت انى مش ناسية منك اى حاجة :)

عشان كل اللى قولتهولك ده وعشان انت عمرك ما كنت حد عادى بالنسبالى فراقك كمان مكنش عادى خاااالص , انا اتقهرت عليك :(

انا عارفة انى مروحتش العزا بس عشان هما ما رضيوش يودونى على اساس انى عيلة , اكتر حاجة كانت قهرانى انى مش هشوفك تانى!!

فضلت كتييييير مش مستوعبة ده , بس لحد دلوقتى مكانك فاضى وهيفضل طول عمره فاضى لحد ما اقابلك تانى ان شاء الله :)

يارب يا حبيبى تكون فى مكان احسن من هنا بكتيييير وتكون مبسوط فى دار أحسن من دارك ومع أهل أحسن من أهلك

حاجة اخيرة : انا عمرى ما حبيت حد زيك :)

ربنا يرحمك يا جدو ويجعل مثواك الجنة ان شاء الله :)

احـسـاسـى انـى لـسـه أنـــا

كل سنة بتعدى على الواحد بتغير فيه كتير , فى تفكيره وفى حياته وفى كل حاجة

مقتنعة جدا ان كل حاجة بتحصل فى الدنيا دى بتحصل لسبب , كل ضربة بتيجى بتيجى عشان تقويك , كل حد بتقابله بتقابله عشان تتعلم منه حاجة

أنا نفسى مش زى ما كنت من سنة ولا سنتين , الحاجات الوحيدة اللى مش بتتغير فيك هى اللى بتتغرس فيك من وانت صغير

فى المواقف الصعبة بيبان معدنك انت حد نضيف وعندك أصل ولا انت أى كلام وما عندكش أصل

بيعدى عليا مواقف كتير صعبة بقول انا هتغير وهعمل وهعمل وفى اول موقف بيحصل بيبان انى لسه نضيفة واصيلة زى ما انا ودى حاجة بتفرحنى

بفرح برضه أوى لما ألاقى ناس فاهمانى صح وعارفة قد ايه هما مهمين عندى زى ما انا مهمة عندهم

الناس دى مش لازم اكلمهم كل يوم ولا اشوفهم كل يوم احساسى انى عرفت ناس زى دى لوحده كفاية

(( انتى جدعة أوى ولما بتحبى حد بتحبيه بجد ولو كسبك ممكن تديله عينك ولما بتصاحبى حد بتصاحبيه بجد))

الكلام ده كان كفاية اوى انه يقلبلى المود بتاعى تماما من واحدة حاسة انها ولا حاجة لواحدة حاسة ان فيه حد فهمها صح وما فسرش تصرفاتها على كيفه :))

راضية أوى بالكام حد اللى يتعدوا على الصوابع اللى طلعت بيهم من الدنيا , غيرى ما طلعش بـ ولا حد !!

ولو حتى مش كل اللى بحبهم دول معايا على طول عشان الظروف وكده فـ أنا برضة فرحانة بيهم أوى

الحمد لله :)))

انــتـــوا لــيـــه كـــده ...؟؟؟!!!!

دايما الواحد بيكون متوقع ان الناس تعامله زى ما بيعاملهم خصوصا لو بيعاملهم كويس

انا ليا مبدأ بتعامل بيه مع الناس لما اكون زعلانة او شايلة من حد فى حاجة استحالة اهزر واضحك معاه عادى مش بعرف لازم افش خلقى فيه الاول واقوله انى زعلانة عشان كذا وكذا وكذا وبعدين بقى بعد ما بقول مش ببقى مستنية معلش حتى وممكن اضحك واهزر عادى !!

اكتر حاجة بكرهها بقى فى حياتى لما حد يفضل يشيلك ويكوملك وتقوله مالك ؟؟ يقولى مفيش انا بتعامل عادى معرفش ده العادى على اساس ايه !!! , ويفضل بقى يلقحلك فى كلام اسخف من السخافة نفسها والمفروض انه بيهزر , طب يعنى مادام مش عايز تقول مالك يبقى المفروض تتعامل عادى يا ما تتعاملش خالص , انا شايفة ان اى حد طبيعى المفروض يعمل كده

نفسى افهم ليه فيه ناس بتتعمد تستفزك وتطلع اسوأ ما فييييك وتقولك ايه مالك كده انا بهزر !!! بيبقى مفيش اى مجال للهزار وبيهزروا !! ليه الناس بتتعامل بالخباثة دى ؟؟ ليه مش اللى فى قلبهم على لسانهم ؟؟ الدنيا مش كانت هتبقى اسهل لو كل الناس بقى اللى فى قلبها على لسانها , زعلان من حد قوله زعلان منك عشان عملت كذا كذا ده لو باقى عليه يعنى !!!

انا أهلى علمونى كده تعاتبى الناس مش تتقمصى وتاخدى جمب وتشيلى , عشان كده انا كده وهفضل كده حتى لو الناس مش بتعمل معايا كده أنا هفضل أعمل كده مش عشان حد بس عشان انا ارتاح عشان القلوب الطيبة هى اللى ما تشيلش جواها وانا مش عايزة قلبى يبقى منقط أسود أقلها قدام نفسى حتى لو فيه ناس شايفانى وحشة وفيا اللى فيا فـ هما شايفنى كده عشان هما كده زى ما أنا بشوف كل الناس طيبة ومش قصدها كل الناس تشوف بقى بالطريقة اللى تريحها وتتعامل بالطريقة اللى تريحها انا مبسوطة كده.

كـل سـنـة وأنــت كــل حــاجــة

مفيش مناسبة أحسن من دى عشان أقولك الكلام ده وأنا ما صدقت بصراحة

من زمان أووووى وعلاقتى أنا وأنت حاجة تانية غير علاقة أى أب ببنته عشان أنت بالنسبالى مش بابا بس أنت بالنسبالى حاجات كتير

من وأنا صغيرة كانوا دايما يقولولى : بكرة يا نيفين لما تكبرى وتتجوزى , وأنا كنت بقولهم أنا مش هتجوز أنا مخطوبة لبابا وكنت بقولها بجد ومقتنعة جدا

من وأنا صغيرة أوى وأنا مرتبطة بيك جدا وكل الناس كانت بتلاحظ ده كانت دايما اى حد يعرفنا كويس يقول (( دى نيفين حبيبة قلب باباها ودلوعته )) ولحد دلوقتى بيقولوا كده ودى حاجة بتفرحنى أوى بجد

أنا ما حبيتكش كده من فراغ ولا نمت وصحيت لاقيت الدنيا كده لأ بس عشان انت أطيب وأحن أب فى الدنيا لينا ذكريات كتيرة أوى مع بعض عمرى كله اللى فات كان معاك وان شاء الله اللى جاى

فاكرة زمان كنت بتذاكرلى وكنا دايما نتخانق عشان انت عايزينى أحل كل المسائل وأنا كنت ببقى عايزة ازوغ ومكنتش بتسيبنى عشان كده قولتلك خلاص انا هعتمد على نفسى واذاكر لوحدى عشان كنت هبلة وفاكراك بتعمل كده عشان تضايقنى مكنتش فاهمة انه عشان مصلحتى

فاكرة زمان لما كنت بفضل اسأل اسئلة مش منطقية خااالص وكنت بتفضل تكلمنى كأنى كبيرة وتفهمنى ومكنتش بتزهق منى ابدا مع انى كنت عيلة صغيرة

انت كنت فى كل حياتى ليك دور من يوم ما جيت الدنيا لحد دلوقتى زمان مثلا لما كنا فى المدرسة انا وجهاد كنت بتصحى الصبح معانا عشان تصحينا وتساعدنا فى اللبس وكنت بتحضر معايا شنطتى وتنزل تركبنا ال bus وكنا واحنا بنلبس تفضل تغنيلى حليم أنا اصلا حبيت حليم منك وعشانك

وانا صغيرة كمان كنت جبانة اوى وبخاف انام لوحدى وافضل اعيط وازن وانت كنت تيجى تنيمنى ومكنتش بتسيبنى ابدا غير لما انام وتفضل تحكيلى حواديت

ولما كنت بعيا وماما مش بتعرف تاخد اجازة تقعد معايا كنت انت بتاخد اجازة وتقعد معايا ونفضل نلعب ونغنى ونتفرج على الكارتون كنت بنسى انى عيانة اصلا

سيبك من كل ده انا بحبك أوى لما تقعد تحكيلى عن يوم ما اتولدت وقد ايه انت كنت فرحان وهتطير من الفرحة لما الممرضة قالتلك انى بنت وكانت خايفة تقولك احسن تزعقلها وانت طيرت من الفرحة وكنت ماشى تقول للناس انك جيبت نيفين لانك كنت مقرر انى نيفين من قبل ما اجى الدنيا بسنين

زمان لما كنت بتخانق مع جهاد كنت دايما بتيجى فى صفى وتقوله اوعى تمد ايدك على اختك لا قدامى ولا من ورايا ولما سألتك لما كبرت ليه كنت بتعمل كده قولتلى عشان كنت بتحسنى اضعف منه , عمرى ما حسيت بحتة البنت والولد دى فى بيتنا ومنك أنت بالذات

فى أصعب الأوقات فى حياتى وفى قمة الانهيارات اللى بعدى بيها انت بتبقى أول حضن يتفتحلى زى يوم ما كنت عندى الصبح امتحان وانت صحيت الفجر على صوتى وانا بعيط وفضلت واخدنى فى حضنك وتتبطب عليا وقولتلى (( انتى دموعك دى غالية اوى عندى ولو مش قادرة تروحى الامتحان بكرة ما تروحيش المهم تبقى كويسة عشان انتى اغلى حاجة فى حياتى )) ساعتها حسيت قد ايه انا مبسوطة بجد انك بابا

وجودك فى حياتى ومعايا حتى لو مش بنتكلم كتير بيحسسنى بالأمان انى ليا ضهر مسنودة عليه لما بتروح اى مكان ببقى هموت من القلق عليك صحيح كنت بتسافر كتير وانا صغيرة فمكنتش فاهمة أوى لكن آخر مرة سافرت انا كنت فى ثانوية عامة لما روحت ايطاليا فاكرة ساعتها كنا فى عز التلج ونزلت وصلتك لحد تحت ومرضتش تاخدنا المطار نوصلك يومها عيطت لما قولت يا بس كنت حاسة ان الدنيا فيها حاجة غلط من غيرك وعييت وفضلت فى السرير الاسبوع اللى انت سافرته واول ما كلمتنا من هناك كلمتنى انا كانت الساعة ستة الصبح وانا كنت لسه نايمة قومت على تليفونك ولما سمعت صوتك قعدت اتنطط من الفرحة ونسيت انى كنت عيانة ونسيت كل حاجة

عمرك ما غصبتنى على أى حاجة فى حياتى دايما تقولى انا واثق فيكى انا بس هنصحك وانتى تختارى اه بقيت حاليا تخاف عليا اكتر من اللازم بس انا عارفة ان ده حب ليا مش اكتر

انا عارفة ان فيا حاجات كتييير مبقتش بتعجبك حتى انت بتقول كده ساعات بس انا ما غيرتش رأيى أنت أهم حد فى حياتى وهتفضل كده لأن كل اللى فات من عمرى وعيشت معاك فيه يخليك أهم حد فى حياتى لآخر عمرى , أنا عارفة انى مش بقولك دايما انى بحبك يمكن مش بعرف اوصلك ده بالكلام بس انا بحب اهزر واضحك معاك وبفرح أوى لما بقولك حاجة وتضحكك وبحب أوى لما أقعد اتناقش أنا وأنت ونتكلم كتييير وأقولك أحكيلى زمان الدنيا كانت ازاى وتحكيلى بغض النظر عن أى حاجة أنا فخورة أووووى ان أنت بابا وانى اتولدت اسمى نيفين يــســرى , بحبك أووووى بجد وعارفاك ساعات بتتخنق لما بقولك ما تكلمش دى وما تهزرش مع دى وبتزعقلى وتقولى انتى انانية بس دى غيرة انا البنت الوحيدة اللى على وش الدنيا اللى اسمى على اسمك يبقى من حقى اغير عليك وازعل لما تدلع حد غيرى

كنت هنسى أهم حاجة (( كـــل ســـنـــة وأنـــت أحـــن وأطـــيــــب أب فــى الدنـــيــــا , كــل ســنــة وأنـــت أبــويـا وأخويــا وحبــيــبــى وابــنــى وكـــل حـــاجـــة حــــلـــوة حــصــلــتـــلــى , ربــنـــا يخـــليــك ليـــا ضهــرى وســـنـــدى وأمـــانــى فـــى الدنـــيــا ))

امضاء : بهـجـت الأبـاصـيـرى

أيـوه بـكـدب ..!!!

مؤخرا اكتشفت حاجة خطيرة أوى ॥ انى بكدب فى حاجات كتير !!

بس اكتشفت السبب برضه انى دايما بكدب عشان مش عايزة اسمع كلمة تضايقنى يمكن لانى مبقتش مستحملة كلمة زيادة من حد

انا واحدة من طبيعتها لما تبقى مخنوقة مش ببقى عايزة اكلم اى مخلوق على وش الارض عشان مش بعرف اتكلم فى حالة زى دى وساعات بتوصل انى ممكن اسخف على اللى بيكلمنى كمان مش عشان انا قليلة الذوق بس عشان انا من النوع اللى بيكتم جواه وبيسكت كتير بس اول ما بنفجر خلااااص بجيب عاليها واطيها وده غلط وانا عارفة !!

عشان كده ناس كتييير بتشوفنى كئيبة وبزعل من غير اسباب و و و بس ايه لازمة كلامهم يعنى !! ما يشوفوا

انا فاكرة من كام سنة كده وانا اصغر من كده شوية كنت بزعل اوى لما حد يقولى كده انى كئيبة وبتاع لدرجة انى وصلت للكتمان اللى انا فيه ده ابقى زعلانة ومتضايقة وفيا اللى مكفينى وافضل اهزر واضحك عشان محدش يقولى انى كئيبة بس ده غباء هما مالهم انا كئيبة ولا غيره هما عارفين انا بقيت ليه كده اصلا دخلوا جوايا ولا حسوا بيا يعنى ؟؟!!

المهم انى من كتر ما بقيت ادارى اتقنت الكدب ॥ دايما (( عاملة ايه؟؟ )) (( انا كويسة اوى الحمد لله )) (( انتى بجد كويسة؟؟ )) (( ايوه مانا زى القردة اهو )) مع انى كتير مش بكون كويسة خالص بس هتكلم ليه !!! يعنى بعد ما احكى هيعملولى ايه بقى ؟؟ هيقولولى معلش وكده ॥ معلش دى اصلا من اكتر الكلمات اللى بكرهها فى حياتى فخليهالهم احسن

من الاخر وباختصار اللى فيا يخصنى انا اللى اقرر عايزة اقوله ولا لأ واقرر كمان اقوله لمين

ومن الاخر برضه انا كئيبة وعاجبة نفسى جدااااا

أهـلا بـيـكـم فـى وطـنـكـم ..

(( أهـلا بـيـكـم فـى وطـنـكـم )) ॥ طـبـعـا الـجـمـلـة دى مـلـهـاش أى عـلاقـة بـالـسـيـاسـة هـى لـيـهـا عـلاقـة بـالـسيـمـا ॥ أو بـمـعنـى أصـح بـالـخـيـال الـعـلـمـى للـسـيـمـا (( مـع الاحـتـفـاظ بـحـقـوق الـمـلـكـيـة لـعـمـرو ديـاب طـبـعـا =डी )) ॥ بـحـس ان دايـمـا فـيـه فـجـوة كـبـيـرة أوى بـيـن الـسـيـنـمـا والـواقـع بـمـعـنـى ان كـل حـاجـة فـى الـسـيـنـمـا مـتـاحـة ومـمـكـنـة ॥ كـل حـاجـة بـجـد !! ॥ يـعـنـى مـمـكـن ابـن الـبـاشـا يـتـجـوز واحـدة مـن الـشـارع ويـعـيـشـوا مـبـسـوطـيـن عــادى ॥ مـفـيش فـوارق بـيـن الـنـاس ولازم الـفـيـلـم يـنـتـهى بـجـوازة عـشـان كـل الـمـشـاكـل لـيـهـا حــل طبـعـا ॥ وبـالـتـأكيـد لازم الخـيـر يـنـتـصـر فـى الاخـر والـشـريـر يـعـرف غـلـطـه ويـقـول सॉरी =डी॥ بـغـض الـنـظـر عـن كـل الـخـيـال العـلـمـى ده لازم فـى أى مـشـهـد فـيه خـنـاقـة أو أكـشـن بيـبـقـوا طـبـعـا بـتـاع ४ او ५ مـلـمـومـيـن عـلى البـطـل عشـان يـضـربـوه وهـو طـبـعـا سـبـع الـرجـال بيـقـوم بيـهم كـلـهـم !!! أكـتـر شـىء مـسـتـفـز بقـى فـى الـمـشـاهـد اللـى زى دى انـهم بيـدخـلـوا يـضربـوا البـطـل واحـد واحـد عشـان يـاخـد فـرصتـه بـرضه الـراجـل =दद ॥بجـد سـاعـات بحـس ان الأفـلام دى بتـتـعـمـل عـشـان تـخـلى النـاس تـهـرب مـن الـواقـع اللـى عـايشـيـنـه زى مـا بـريـل بـتـغـطـى عـلـى المـر اللـى بـنـدوقـه =दद ॥ نـفـسـى أحـس ان بـجـد كـل الأفـلام الـلـى بـتـتـعمـل بـتـتـعمـل عـشـان تـحـل مـشـاكـل النـاس عـايشـاها وحـاسـاها بـجـد مـش كـأنـهم بيـعمـلوا أفـلام فـى بـلاد تـانيـة أنـا مـش عـارفـاها الحـقـيـقـة !!!

خـــط أحـــمـــر ...!!!

الـكـلـمـة دى بـقـيـت بـسـمـعـهـا كـتـيـر أوى الـيـومـيـن دول ॥ تـقـريـبـا كـل حـاجـة فـى حـيـاتـنـا بـقـت خـط أحـمـر ॥ طـب ايـه الـلـى اخـتـلـف عـن زمـان يـعـنـى !! ॥كـل حـاجـة اتـحـولـت تـقـريـبـا لـخـط أحـمـر الا الـبـنـى آدمـيـن الـلـى كـانـوا وهـيـفـضـلـوا خـط بـمـبـى =दद ॥ أنـا بـقـى مـش شـايـفـة ولا مـقـتـنـعـة بـده بـصـراحـة شـايـفـة ان مـفـيـش اى خـطـوط حـمـرا أصـلا كـل حـاجـة فـى الـدنـيـا دى قـابـلة للأنـتـقـاد والنـقـاش والـتـعـديـل عـشـان مـفـيـش أى حـاجـة خـارج نـطـاق الخـطـأ وعـشـان مـفـيش أى حـاجـة مـهـمـا بـدأت صـح بـتـفـضـل مـكـمـلـة فـى طـريـق مـسـتـقـيـم عـلـى طـول ॥لـيـه بـقـى بـنـدفـن راسـنـا فـى الـرمـل وبـنـقـول ده خـط أحـمـر وده خـط بـتـنـجـانـى !! لـيـه مـا نـقـتـنـعـش انـنـا مـمـكـن نـتـكـلـم فـى أى مـوضـوع ومـمـكـن نـنـتـقـد أى حـــد مـش مـعـنـاه ان الحـد ده وحـش لأ مـعـنـاه ان فـيه حـاجـة غـلـط حـصـلـت أو انـحـراف مـعيـن بـس لـو اتـكلـمنـا مـمـكـن يـكـون فـيه حـل ॥ احـنـا بـشـر مـش آلـهـة يـعـنـى خـطـائـيـن بـطـبعـنـا مـش عـيـب ابـدا الـعـيـب انـنـا نـنـكـر ده ॥ بـجـد الـيـوم اللـى هنـبـطـل فـيه نـقـدس الأشـخـاص هـو الـيوم اللـى هـنـعـرف نـواجـه فـيه مـشـاكـلـنـا هـو نـفـس الـيـوم اللـى هنـبـتـدى نـتـقـدم فـيـه لـقـدام =))