اللى يسألنى انا متعصبة ؟؟؟ هقوله اه متعصبة جدا , انا كده بتعصب للحاجة اللى بقتنع بيها
انا عارفة ان الاراء حرية شخصية كل واحد حر فى رأيه وعمرى ما بهاجم حد فكر وفهم وسمع وكون رأيه حتى لو مختلفة معاه عشان هو عنده اسبابه اللى وصلته لرأيه ده , لكن أكره الغباء وترديد الكلام وعدم الفهم ولا حتى محاولة الفهم ده فى رأيى غباء مطلق " واحد حافظ مش فاهم !!! "
الانسان لو فكر شوية ربنا ميزه عن الحيوانات فى ايه هيلاقى اللى بيميزه عنهم هو " العقل " وأكيد ربنا وهبنا العقل عشان نستخدمه مش عشان نخليه ديكور ولا نتمنظر بيه على الحيوانات مثلا !!!
ارجع للموضوع اللى عايزة اتكلم فيه " الــثـــورة " أول ما بدأت تظهر دعوات ان الناس تنزل يوم خمسة وعشرين يناير ناس كتير اوووى شغلت اسطوانة الاحباط وقالت هتفشل هتفشل مفيش ثورة بتبقى متحددة بميعاد مسبق وكمان مفيش ثورة من غير قائد , جيه يوم خمسة وعشرين والناس نزلت ( محدش سأل نفسه كل الناس دى نزلت ليه رغم كل الاحباطات دى وفى عز جبروت الداخلية والناس كانت متوقعة لو فشل اليوم ده الناس دى هيحصلها ايه؟؟ أنا أقول الناس دى نزلت عشان تعبت وجابت اخرها عشان مش شايفين أمل فى البلد دى فى أى حاجة فمسكوا بآخر حبل ممكن يوصلهم لحاجة من الآخر يعنى كانت خربانة خربانة !! ) المهم الناس نزلت فعلا وحصل الضرب اللى كلنا حضرناه وشوفناه ضرب وسحل واعتقالات وتغريق بالمية و و و !! وزى العادى المتفلسفين طلعوا وقالوا هتفشل وهتتخمد الثورة عشان الداخلية أقوى وأعنف وأشرس من أى محاولات للثورة والحمد لله عشان ربنا مش بيرضى بالظلم استمرت المواجهات ليوم تمانية وعشرين لحد ما الشرطة انسحبت ونزل الجيش طبعا فى الفترة ما بين انسحاب الشرطة ونزول الجيش ده كانت فترة فتح السجون وتسريب البلطجية على الناس ورعب وترهيب الناس ده ودى الفترة اللى اترفع فيها شعار " انتوا خربتوا البلد منكوا لله " والجيش نزل بعدها والناس قابلته بالهتاف والزغاريد لأنه كان المنقذ الوحيد وقتها وبدأت هتافات " الشعب والجيش ايد واحدة " تهز أرجاء البلاد عدت أيام الثورة واتخلع مبارك واستسلم للأمر الواقع وتولى المجلس العسكرى شئون البلاد
ومن يومها أى كارثة ومصيبة بتحصل فى البلد بيبقى سببها الثورة طبعا أى اعتصام يحصل بيعطل عجلة الانتاج والثورة السبب اى قرار يتاخد غلط من اى كان مين تبقى برضه الثورة السبب " والبلد اتخربت "
حتى فى الوضع الحالى لما الثوار والشعب عموما بيحاول يكمل ثورته اللى كانت خلاص بتتسرق فعلا من جهات عديدة استفادت وعايزة تستفيد على حساب الدم المراق على أرض الوطن اللى لا يجوز ان حد يستخدمه ويستغله لمصالح واغراض شخصية !!!
باختصار دم الشهداء لن يستغل المتاجرة بمصابين الثورة لن تتم بيع الثورة واخمادها ومحاولة اجهاضها لن يحدث , عارف ليه ؟؟!!!! عشان لسه فيه ناس بتقول لأ للظلم ولأ للقهر ولأ للكدب ولأ للاتجار بالثورة واخمادها
الثورة دى اللى رجعت النفس فى رئات المصريين الثورة دى اللى خلتنا نحس ان لسه بكرة ممكن يجى حلو علينا الثورة دى اللى خلتنا نعرف ان الحق لازم يجى آخر كل ظلم الثورة دى اللى ناس كتير ضحوا بأرواحهم وبعينهم وبرجلهم وايديهم عشان باقى الناس يشوفوا مصر جديدة وعشان يشوفوا هما باللى باقيلهم مصر جديدة
مصر بتتطهر مصر بتتعالج عشان تبقى قوية مصر بكرة هيبقى احسن فيها ان شاء الله
وانا متعصبة للثورة من قبل خمسة وعشرين وانا معاها وبشجعها قلبا وقالبا وهفضل معاها ومتعصبة ليها وبدافع عنها واحاول افهم اى حد عنده التباس عشان ده دورى
الثورة دى رضا ربنا علينا وانصافه لينا وفرصته اننا نتغير ونطهر ونلحق نفسنا
لكل الناس اللى هاجمتنى وانتقدتنى وخسرتنى عشان كلامى عن الثورة انا مش زعلانة منكوا انا بجد زعلانة عليكوا
يـــارب انصر ثورتنا واحقن دمائنا واكتلبنا الخير على قد نية كل واحد بيحب البلد دى
