فنجرية البوق

أنا هعمل وهسوى , أنا لو مكانه مش هتصرف كده , أنا لما يحصل كذا هعمل كذا , أنا أول ما تجيلى الفرصة هعمل وهعمل وهعمل ....

امتى بقى هنقفل بوقنا ونعمل فعلا !!! , أنا مش بقول كده عشان انا مش من الناس دى بالعكس ده أنا أولهم أنا بقول كده عشان زهقت منهم ومنى , عايزة أعدى مرحلة الكلام وابتدى مرحلة الأفعال بس فيه حاجز !! , يجوز يكون الحاجز ده خوف مش بس عليا ده من ناس كمان وعلى ناس , ياريت الموضوع كان موضوع بس خوف عليا كنت متهيألى هعرف أعدى ده أو ممكن ماكنتش هعرف برضه !!!

عن حب البلد بتكلم , عن حب البلد بالأفعال , عن انى عارفة انى مستعدة جدا أموت عشانها بس لسه ما أخدتش الخطوة , عن كلمة "لأ" اللى بقولها بس ببوقى وبحبة شعارات خايبة !!!

ساعات بحس انى من أكتر الناس اللى بتحب البلد دى وبرجع احرج نفسى واقولها " اسكتى يا خايبة يا قليلة الحيلة انتى تيجى ايه فى اللى ماتوا فدا ترابها ؟؟ انتى عملتى عشانها ايه اصلا ؟؟ بقى انتى اللى بتفضلى تعملى فيلسوفة عصرك وتقولى عمر الحب ما كان بالكلام ؟؟؟ امال انتى نازلة كلام وشعارات واشعار على البلد ليه وانتى ما عملتيش عشانها ولا أى حاجة !!! "

حاسة ان فيه خطوة ممكن اخدها كتير فشلت انى اخدها بس لو خططت صح مرة واحدة ممكن تظبط معايا

عايزة لو ربنا كاتبلى يكونلى اولاد اقولهم انا عملت كذا كذا عشان بعشق تراب البلد دى وجرالى كذا وكذا بس مش زعلانة عشان ده حقها , هقولهم عملت كل ده عشان هى ما تستاهلش أقل من كده بالعكس تستاهل أكتر بكتييييير , هقولهم مش ندمانة ولو رجع بيا الزمن مليووووون مرة هعمل نفس اللى عملته واكتر لو قدرت , هقولهم عملت كده عشانكوا انتوا كمان عشان كان نفسى الخوف ما يعرفش قاموسكوا ما ترضعوش خوف وتتربوا خوف وتسكتوا وتبلعوا لسانكوا خووووف زى ما احنا ما اعرفناش غيره من يوم ما جينا الدنيا =)

أنا ما أجيش أى حاجة فى اللى اتصابوا عشانها واللى فقدوا عينهم ولا ايدهم ولا رجلهم ولا اتشوهوا ولا طبعا أجى أى أى حاجة فى اللى مات فداها وده كان اختياره , مهما الموازين اتقلبت وبقى الشهيد يتشكك فيه ويتخون والثوار اتخونوا والثورة بتتسرق , مهما الظلم رجع يجرى فى عروق البلد تانى ويسمم دمها , مهما حـــصـــــل أنا هفضل مقتنعة انها عمرها ما بتخلص كده ده ربنا اسمه العـــدل

أنا لسه مستمرة فى الكلام ولسه ما عملتش حاجة بس أنا بحاول وبجد هوصل وهعمل ان شاء الله =))