استفتى قلبك

فى بلدنا الحبيبة مصر اصبحت كمواطن فيها مضطر لاختيارات مصيرية كل فترة قصيرة , بداية من استفتاء مارس 2011 ولحد استفتاء الدستور 2013 انقسامات متتالية واختيارات متتابعة , مش الفكرة انت اختيارك صح او غلط الفكرة انك تختار فعلا وتختارش الحياد دايما , الاختيار دايما صعب وتحديد موقفك اصعب والصورة فى الغالب ضبابية ولا تساعد على الاختيار اطلاقا , الكلام دايما كتير والتكفير اكتر والتخوين اكتر واكتر , الاراء المحيطة غالبا متباينة لحد الجنون , انا بلتمس العذر لأى شخص محتار فى تحديد موقفه فى اى موقف مر علينا ولكن بيصعب عليا فهم فكرة الحياد فى "الدم" الحياد فى "الانسانية" , بيصعب عليا فهم فكرة ان فلان يستاهل يتسحل او يتقتل او او او , ولأن الكلام عن ما مر ليس مجاله  الان , فى العموم اسهل وسيلة للوصول لقرار وتحديد موقفك ان تستفتى قلبك وضميرك معا , افعل يا ابن آدم ما شئت فكما تدين تدان 

ما تتأقلمش

التأقلم افضل طريقة للتعايش لكن التغيير افضل طريقة للعيشة .. صحيح ان فيه حاجات كتير حلها الوحيد التأقلم زى اهلك مثلا لازم تتأقلم معاهم مهما كانت الاختلافات .. لكن لو هنتكلم على المستقبل وحياتك بعد كده التأقلم عمره ما هيكون حل .. ما تسمعش حد يقولك ادخل كلية كذا عشان مستقبلها كويس وانت اصلا مش بتحبها ما تقنعش نفسك انك هتتأقلم فيها عشان مش هتتأقلم .. ما تسمعيش حد يقنعك ان فلان مناسب جدا ليكى وان عمرك ما هتلاقى احسن من كده وما تصدقيش انك هتتأقلمى بعدين وانتى مش مقتنعة عشان مش هتتأقلمى .. ما تسمعش اللى يقولك ان الحياة ليها خط واحد كلنا لازم نمشى عليه عشان نكون طبيعيين وهو انك تتعلم وتخلص تعليم تشتغل وتتجوز لو مش مقتنع ان الخط ده يناسبك ما تمشيش عليه وتقول هتأقلم عشان مش هتتأقلم .. ما تشتغلش شغل ما بتحبوش عشان بيجيب فلوس وتقول الشغل اللى بحبه مش بيأكل عيش لو بتحبه هيأكلك عيش لو مش حاليا ف بعدين مهما حاولت تتأقلم فى شغل ما بتحبوش عمرك ما هتتقدم خطوة ومش هتتأقلم .. ما تسمحش لحد يرسملك شكل حياتك ويقنعك ان دى انسب حاجة وانك لازم تتأقلم انت ممكن تعرف تتأقلم بس اكيد عمرك ما هتكون مبسوط لان ببساطة مفيش حد هيعرف المناسب ليك ولا الحاجة اللى تسعدك غيرك .. اختار اللى يناسبك وغير اللى شايفه لازم يتغير.. اللى حواليك هما اللى يتأقلموا مع شكل حياتك مش العكس.. حقيقى ان التغيير مش سهل وان تغيير حياتك خصوصا فى حاجات مصيرية زى التعليم والشغل صعب جدا بس هو اسهل اكيد من انك تعيش طول عمرك تقنع نفسك انك لازم تتأقلم لا وكمان تقنع نفسك انك بكرة هتكون مبسوط حتى لو بكره ده مش هيجى ! .. الحلول الجذرية دايما افضل من الحلول السطحية حتى لو اصعب حتى لو هتخسر كتير وانت بتحلها .. الحلين موجودين عايز تتأقلم غير كل طموحك واحلامك عشان تمشى مع الواقع المفروض عليك .. عايز تغير حاول بكل الطرق تغير كل الظروف اللى حواليك عشان توصل للصورة اللى فى خيالك الصورة اللى انت رسمتها وما تتنازلش ابدا انك توصل للصورة دى حتى لو ما نجحتش من اول مرة المحاولة فى حد ذاتها تغيير .. ما تمشيش فى الطريق السهل عشان سهل امشى فى الصعب عشان اخره هتكون مبسوط