شىء من الخجل .. أرجوكم

المشهد العام ضبابى جداااا , مش عشان الحقائق مش واضحة بالعكس الحقائق واضحة جدا (لأى حد عايز يفهم ) لكن هو ضبابى عشان الكئابة غالبة عليه

حاسة انه حد عامل عمل للبلد دى عشان فرحتها ما تكملش ابدا , وفى نفس الوقت مش عارفة اتخيل واستوعب بشاعة الموقف , انا من زمان خلاص مقتنعة ان التخوين بقى سمة من سمات البلد دى بس عمرى ما كنت اتخيل ان قلة الاحترام والأدب والضمير والبجاحة تبقى عينى عينك كده لدرجة اننا وصلنا لدرجة انه مفيش اى محرمات ولا أى خطوط حمراء كله مباح ومستباح , دى واصلة البجاحة انك تشوف بعينك ويقولولك ما حصلش !!! وصلت ان البنات تتضرب وتتسحل وتتعرى وتتخطف و و و يطلعوا ناس بيقولوا انهم (رجالة ) يقولوا احسن ما هى تستاهل هى ايه اللى نزلها !!! حقيقى نفسى ارد عليهم بكلمة واحدة : انتوا ما بتختشوش؟؟ انتوا اكيد لا ليكوا دين ولا ملة ولا عندكوا دم ولا الاخلاق عدت من عندكوا وحقيقى اثبتولى ان اللى اختشوا ماتوا واننا لازم نقرا الفاتحة للرجولة !!

حقيقى ايه معلوماتهم عن الدين؟؟ ازاى يقبلوا ان بنت يحصلها كده مهما كان اللى عملته دى لو مجرمة اقصى حاجة تعملها معاها تقبض عليها وتحاكمها (بالقانون ) ده لو لسه فيه قانون بيتطبق فى البلد دى غير قانون الغابة , الكلام ده مش عليها هى بس الكلام ده على اى بنى لآدم بتسحلوه وتموتوه وتعذبوه وتهينوا كرامته مش من حقكم ربنا اللى اكبر مننا كلنا حرم الدم حرم القتل وكرم البنى لآدم انتوا بتتحدوا ربنا؟؟!!! انتوا هتقابلوه بأنهى وش وهتبرروا اللى عملتوه ازاااى؟؟؟ شوفوا قتلتوا كام واحد واللى قتلتوه ده اتنكب بعده كام واحد !! وسبب انكم بتقتلوهم اييييه انهم بيقولوا الحق اللى انتوا عايزين تخرسوه !! بجد تصعبوا على الكافر عشان فاكرين ان صوت الحق ممكن يتخرس بالقتل انتوا كده بتعلوه =))

المشكلة مش فى اللى بيقتل بس المشكلة فى اللى بيدافع عنه كمان وبيبرر تصرفاته ويقول ان عنده حق ويخلقله دوافع مهما كبرت مش هتوصل حاجة انكوا تستبيحوا حرمة الدم !! بجد اختشوا على دمكم بجد هتتسألوا انكوا ما نصرتوش المظلوم بجد بطلوا تلبسوا عباءة الدين وانتوا ما تعرفوش عنه حاجة وبجد بطلوا ترموا الناس بالباطل

احب اضيف حبة معلومات لفقهاء الدين اللى ما يعرفوش عنه حاجة وبيقولوا تستاهلوا عشان نزلت :-
سبب غزوة بني قينقاع أن يھودي ربط ثوب امرأة مسلمة فظھر جسمھا لما وقفت فأجلاھم الرسول عن المدينة

أسماء بنت يزيد قتلت 9 من الروم في معركة اليرموك مش مشاركة بس

الصحابية خوله بنت الاوزور ارعبت جيوش الروم بمفردها ودخلت وسطهم تقاتل كالاسد حتى انها قهقرت جيوش الروم الى الوراء وكان خالد ابن الوليد موجود فى المعركه وهي تقاتل

الصحابية نسيبه بنت كعب كانت تحارب فى جيوش المسلمين ودافعت عن الرسول فى احدى الغزوات بالسيف وحمته من الكفار ॥ امراه حمت الرسول مع ان الرسول رجل والصحابه كانوا حوله والرسول اشاد ببراعتها وقال ما التفت يمينا او يسارا الا رايتها تقاتل دونى

واحب اضيف ان النساء ايام الرسول كانوا يقعن فى الاسر فى الغزوات والرسول مكنش بيقول يارتنا منزلناهم ولا خليهم فى بيتهم!!

اتقوا الله فى النساء وفى عرضكم اعرفوا دينكم كويس الدين مش تشدد وفهم باطل الدين ما قالكش مش تغيرش على عرضك ويبقى دمك بارد الدين ما قالكش تقول على واحدة يحصل فيها كده انها تستاهل ( حتى لو كانت مذنبة فى رأيك )

بجد حسبى اللى ونعم الوكيل =//

اللهم أرنا الحق حقا وأرزقنا اتباعه وأرنا الباطل باطلا وارزقنا اجتنابه