خيالات الأشخاص

ربنا خلق ناس كتير فى الدنيا ما خلقش الانسان لوحده عشان الناس محتاجة بعضها عشان تعيش مش احتياج مادى اكتر ما هو احتياج معنوى ( دى وجهة نظرى الشخصية)

وجود الناس مع بعضها ومساعدتهم لبعض بأقل كلمة حتى بيخلى الواحد يحس بالأمان والونس وانه مش لوحده وانه يهم الناس اللى حواليه وانه ليه قيمة عندهم وهما حاسين بيها جدا (أقل كلمة ممكن تخلى الواحد يحس ده والعكس صحيح برضه )

لكن فيه نقطة تانية ممكن تحصل انك يكون حواليك ناس اهلك واصحابك ومعارفك وكده بس مش حاسس ان حد ساندك أوى يعنى مثلا مش حاسس انك لو حبيت تعتمد على حد فيهم بشكل كلى انه هينفع او هو هيقدر او هيستحمل !!!

كل واحد فى حياته حاجات كويسة وحاجات مش كويسة بس فى نظرى ان اكتر حاجة كويسة ممكن تكون فى حياة حد انه وقت ما يحتاج يتكلم يبقى عارف هيتكلم مع مين , مين اللى هيستحمل , مين اللى هيفهم , مين اللى هيحل , مين اللى هيشجع , مين اللى هيسند ويواسى , لو فيه حد فى حياته شخص واحد ممكن يعمل كل ده ده يبقى انسان محظوظ جدا

عايزة اتكلم عن حلم شخصى عندى انا كان نفسى يكون عندى اخوات كتير ولاد وبنات ونكون كلنا قريبين من بعض وساندين بعض ومفيش حد فينا يخلى التانى يحس انه محتاج اى شخص على وجه الأرض , ساعتها بس كنت ممكن اكون حاسة بالأمان لأنى عارفة انى لما اتعب هلاقى اللى يسند ولما احتار هلاقى اللى يشجع ولما اغلط هلاقى اللى يفوقنى ولما احتاج حتى اعيط مش هدور على حضن اى حد ولا هطلب ولا هتكسف عشان فيه حتة منى ومن دمى هتعمل كل ده

انا عارفة كويس ان الاصحاب كتير بيقوموا بدور الاخوات واكتر خصوصا فى حالة زى حالتى بس عندى الموضوع مش سهل خصوصا فى حوار الفضفضة والكلام ده لانى صعب اوى اسيب نفسى اعيط قدام حد ولو حصل ده بكره نفسى جدا , فى الفترة دى بالذات محتاجة حد يحس بيا من غير ما اتكلم حد يحاول يطلع اللى جوايا معايا محتاجة حد ياخدنى فى حضنه ويسيبنى اعيط بس حد احس انه منى وعادى لما اعيط قدامه وعادى ممكن اقول اى حاجة وقبل ده كله حد احس اصلا انه عايز يسمعنى ويهمه انه يعرف مالى !!!

نفسى ما افضلش حاسة ان ناس كتير فى حياتى مجرد خيالات ناس المفروض يكون دورهم اساسى بس هما قاعدين على دكة الاحتياطى !!

انا مش عايزة ارمى الغلط على اى حد لان احتمال كبير جدا تبقى المشكلة عندى انا انى مش عارفة اتعامل معاهم بطريقة صح وان طريقة معاملتى مش بتعجبهم وان زى ما انا بستغرب طريقة تفكيرهم هما اكيد بيستغربوا طريقة تفكيرى , انا مش برمى اللوم على حد انا بس بتكلم على حاجة كان نفسى فيها ومحتاجاها

انا بس محتاجة حد احس ان انا وهو واحد وانه فاهمنى , محتاجة حد يحتوينى =))