3/8/2011 بداية الأمل :) اليوم ده مش هيتنسى من ذاكرة اى حد .. أول مرة نشوف المخلوع فى القفص .. أول مرة نحس ان ممكن يكون فيه عدل فى بلدنا .. أول مرة نحس ان ممكن القانون فعلا ياخد مجراه بعيدا عن قفانا :).. بعيدا عن المؤيد والمعارض اللى بيقول حرام واللى بيقول حلال .. أحب بس أقول ربنا قال "ولكم فى القصاص حياة يا أولي الألباب".. أرجع لموضوعى الأمل والاحساس ان الحق ممكن يرجع لصحابه .. مش حق الناس اللى ماتت واتسحلت واتدهست بس لالالالا ده حق شعب اتبهدل حق اللى ماتوا فى الأقسام من التعذيب واللى ماتوا من المرض على أبواب المستشفيات من الفقر وحق قمع الشعب وترهيبه وسجنه فى بلده وتفهيمه ان مشيه جنب الحيط حتى لو الحيطة هتوقع عليه أهون من انه يفكر يبعد عن الحيط ! حق اللى كانوا بيتشدوا لمجرد أنهم بيصلوا فى الجامع ولا مربيين دقنهم حق الشباب اللى غرقوا وهما بيحاولوا يهربوا بطرق غير شرعية من السجن اللى متقفل عليهم من كل الجهات .. وقبل كل ده حق الأهالى اللى اتحرموا من ولادهم عشان نزلوا يقولوا كفايانا مش عايزين البيه ! .. كلنا افتكرنا ان اليوم ده بداية النهاية بس للأسف طلع بداية البداية .. من اليوم ده ليوم 2/6/2012 سقف الأحلام الوردية ده كان بيقل كل يوم .. أحداث كتير حصلت فى المدة دى بينت النوايا بينت اللعية والمسرحية .. ناس كتيييير توقعت اللى هيحصل وكانت بتدعى ربنا يخيب ظنها ! لحد يوم الحكم بداية الجلسة الخطبة العصماء اللى إتقالت اللى رفعتنا سابع سما وخلتنى أقول " الحمد لله ربنا خيب ظنى " وبعد الحكم نزلنا على جدور رقبتنا المسرحية خلصت مفيش حق رجع لصحابه لسه الظلم زى ما هو لسه القضاء لا هو نزيه ولا عادل ولا توفيق ولا حسنين ولا اى حاجة لسه بيتضحك علينا :)
عارف يعنى إيه يحاصروك فى أحلامك وأفكارك .. عارف يعنى إيه عايزين بأى شكل يشوهوا حلمك ويخلوه كابوس .. الثورة بالنسبالى وبالنسبة لغيرى كتير كانت حلم وفكرة :) والأفكار مش بتموت والاحلام مهما تتحاصر مش هتتحول كوابيس :) الكابوس هو اللى بيحاول يشوه أفكارك ويحاصر أحلامك ده هدفهم ف أرجوك ما تسمحش بده .. أمسك فى أحلامك جامد وما تتخلاش عنها مهما حصل .. ما تختارش السكة السهلة عشان سهلة السكة السهلة آخرها مرار .. حلمنا هيكمل والثورة هتستمر غصب عن اى حد الثورة كانت بالنسباله نكسة :)
ولو المظالم ما أتردتش هنا هتترد فى مكان تانى بس أشد من هنا 100 مرة !
أرجوك للمرة الأخيرة ما تسمحش لحد يحاصر حلمك :)
ليست هناك تعليقات:
إرسال تعليق